बेल्डाँडी/पुस २७। कञ्चनपुरको बेल्डाँडी गाउँपालिकामा राष्ट्रपति रनिङ शिल्ड प्रतियोगिता शुरु भएको छ।
जिल्लास्तरीय प्रतियोगिताका लागि खेलाडी छनौट गर्न सो प्रतियोगिता गाउँपालिकाले सरस्वती माध्यमिक विद्यालयको प्राङ्गणमा एक कार्यक्रमको आयोजना गरी प्रतियोगिता सञ्चालन गरेको हो ।
उद्घाटन कार्यक्रममा प्रमुख आतिथ्यमा सुदूरपश्चिम प्रदेशसभा सदस्य एवम् संविधानसभा सदस्य दिवान सिंह बिष्ट, सभापति गाउँपालिका अध्यक्ष हरिचन्द्र राना, उपाध्यक्ष शान्ति नाथ गाउपालिकाका अतिथि वडा अध्यक्षहरु, पालिका शाखाका प्रमुख एवं बिभिन्न बिद्यालयका प्रधानाध्यापक, शिक्षक पत्रकार लगायत विभिन्न राजनीतिक दलका प्रतिनिधि, विद्यार्थी,स्थानीयहरुको बाक्लो उपस्थिति रहेको थियो ।
“स्वास्थ्यका लागि खेलकुद, राष्ट्रका लागि खेलकुद” भन्ने नाराका साथ १४औँ राष्ट्रपति रनिङ्ग शिल्ड प्रतियोगितामा पालिका भरीका ९ वटा विद्यालयहरुको सहभागिता रहेको जनाईएको छ।छात्र र छात्रा गरी ९ वटा बिधामा तीन दिनसम्म प्रतियोगिता सञ्चालन हुनेछ । यसका लागि सातवटै मावि गरी डेढ सयभन्दा बढी खेलाडीहरुले सहभागीता जनाएका छन ।
कार्यक्रममा बोल्दै प्रमुख अतिथि समेत रहेका प्रदेश सदस्य बिष्टले यस खेलबाट राष्ट्रिय, अन्तर्राष्ट्रिय स्तरका खेलाडी उत्पादन हुनुपर्दछ भन्देै सहभागी खेलाडीलाई शुभकामना दिएका छन् । उनले खेलप्रेमीहरुका लागि प्रदेशबाट हुन सक्ने सहयोग गर्ने प्रतिबद्धता समेत व्यक्त गरे ।
प्रतियोगितामा छात्र र छात्रातर्फ सञ्चालन हुनेछन । गाउँपालिकामा विद्यालयस्तरमा प्रतिस्पर्धा भएर छनौट भएका खेलाडीले फागुन पहिलो साता जिल्लामा हुने प्रतियोगितामा सहभागी हुनेछन ।
