महेन्द्रनगर । नेपाली काँग्रेसले भोली (फागुन–१६) ‘संविधान संशोधनः आवश्यकता र चुनौती’ विषयक सुदूरपश्चिम प्रदेशस्तरीय अन्तरक्रिया गर्ने भएको छ । पेशागत बुद्धिजीवी विभाग नेपाली काग्रेस र नेपाल डेमोक्य्राटिक लयर्स एशोसियसनको संयुक्त आयोजनामा कञ्चनपुर उद्योग वाणिज्य संघको सभाहलमा उक्त अन्तरक्रिया कार्यक्रम हुन लागेको हो ।
कार्यक्रम नेपाली काँग्रेसका नेता एवम् पूर्वमन्त्री गोपालमान श्रेष्ठको प्रमुख आतिथ्यमा हुने छ । कार्यक्रमको बारेमा जानकारी दिन नेपाल प्रेस युनियन शाखा कञ्चनपुरद्धारा आयोजित पत्रकार सम्मेलनमा पेशागत बुद्धिजीवी विभाग नेपाली काग्रेसका प्रमुख, नेपाली कांग्रेसका केन्द्रिय सदस्य एवम् प्रतिनिधि सभा सदस्य डा. डिला संग्रौला पन्तले संविधान कहाँ–कहाँ संशोधन गर्नुपर्छ ? संशोधनको आवश्यकता र चुनौतीका विषयमा प्रस्तुतिकरण एवम् प्रदेश स्तरीय अन्तरक्रिया हुने बताइन् ।
‘नेपाली कांग्रेस र नेकपा एमाले बिच भएको ७ बुदे सहमतीलाई जनताले स्विकार्दै यो सरकार बनेको हो । ती सात बुदामध्य एक संविधान संशोधन पनि हो ।’ उनले भनिन् ‘संविधान कहाँ–कहाँ संशोधन गर्ने, गर्नुपर्ने आवश्यकता र चुनौतीका विषयमा संविधान विज्ञको प्रस्तुतिकरण सहित प्रदेशस्तरीय अन्तक्रिया गरिन लागिएको हो ।’ उनले अगाडी भनिन् ‘नेपाली कांग्रेस प्रतिवद्ध छ । संविधान संशोधन गर्दा राष्ट्रियता, लोकतन्त्र, गणतन्त्र, संघियता, समानुपातीक, समावेशी प्रतिनिधित्वको मुल संरचनालाई खलबल पु¥याउने पक्षमा रहेको छैन ।’
डा. संग्रौलाले हाल जनताले प्रदेश सरकारको औचित्य खोजिरहेको पाईएको बताउँदै उक्त भोली हुने अन्तरक्रियामा प्रदेश सरकारलाई जवाफदेही र उत्तरदायि बनाउने विषयमा समेत छलफल हुने बताईन् । यस्तै उनले स्थिर सरकार चलाउन अहिलेको निर्वाचन प्रणाली नै बाधक भएको भन्दै अन्तरक्रियामा निर्वाचन प्रणालीमा पनि केही परिवर्तन आवश्यक रहेको विषयमा छलफल हुने बताइन् ।
