महेन्द्रनगर । भीमदत्त नगरमा ६८ औं राष्ट्रिय सहकारी दिवस भव्य रूपमा मनाइएको छ । कार्यक्रमका प्रमुख अतिथि भीमदत्त नगरपालिकाका नगर प्रमुख पदम बोगटीले सहकारी क्षेत्रको महत्व र सहकारी संस्थाहरूलाई पारदर्शी, विश्वसनीय तथा प्रविधिमैत्री बनाउनुपर्ने बताए ।
यस्तै उनले नगरपालिकाले सहकारीहरूको सुदृढीकरणका लागि निरन्तर सहयोग गर्ने प्रतिबद्धता समेत व्यक्त गरे । कार्यक्रममा भीमदत्त नगरपालिकाका नगर उपप्रमुख नीलम लेखक जोशीले सहकारी अभियानलाई प्रभावकारी बनाउन महिला सहभागिता अझ बढाउनुपर्ने भन्दै नगरपालिकाबाट गर्न सक्ने सहयोग गर्ने बताइन् ।
कार्यक्रमका सभापति भीमदत्तनगर नगर सहकारी सञ्जालका अध्यक्ष ईश्वरी खरेलले सहकारी संस्थाहरूबीचको सहकार्यलाई अझ मजबुत बनाउनुपर्ने, पारदर्शिता कायम गर्दै समाजमा सहकारीको विश्वास बढाउनु आवश्यक रहेको बताए ।
सो कार्यक्रममा अन्य वक्ताहरूले सहकारीको वर्तमान अवस्था, सम्भावना तथा चुनौतीका विषयमा आफ्ना विचार प्रस्तुत गर्दै सहकारीलाई पारदर्शी बनाउन प्रविधिको प्रयोग गर्नुपर्ने, नियमित लेखापरीक्षण आवश्यक रहेको र ठगीका घटनालाई न्यूनीकरण गर्न सचेतना अभिवृद्धि गर्नुपर्ने कुरामो जोड दिएका थिए ।
कार्यक्रमको अवसरमा सहकारी क्षेत्रमा उल्लेखनीय योगदान पु¥याएका व्यक्ति तथा संस्था र वक्तृत्व कला प्रतियोगितामा प्रथम,द्धितिय र तृतिय हुने विद्यार्थीलाई पुरस्कार वितरण तथा सम्मान गरिएको थियो ।
कार्यक्रम अघि सहकारी सचेतना अभिवृद्धि गर्ने उद्देश्यले बजार क्षेत्रमा भव्य र्याली समेत निकालिएको थियो । ‘सहकारीमा प्रविधिः पारदर्शिता, विश्वासनीयता र दिगो विकास’ भन्ने नाराका साथ आयोजित कार्यक्रममा सहकारी अभियन्ता, स्थानीय निकायका प्रतिनिधि तथा विभिन्न सहकारी गैरसरकारी संस्थाका पदाधिकारीहरूको उल्लेखनीय उपस्थिति रहेको थियो ।
