महेन्द्रनगर । हिन्दू धर्मावलम्वी नारीहरुले सप्तऋषिको पूजा गरी यस वर्षको तीज पर्वलाई विदाई गरेका छन् । देशभर व्रतालुहरुले मंगलबार शिवालयहरुमा दर्शन गरी नजिकको नदी, खोला, ताल, तलैया, पोखरी वा आफ्नै घरमा स्नान गरी ३ सय ६५ दतिवनले दाँत माझ्ने, गाईको गोबर, माटो र खरानीले स्नान गरि तीजलाई विदाई गरेका हुन् ।
कञ्चनपुरको भीमदत्त नगरपालिका–११ स्थित रामेश्वर मन्दिरमा दर्शन र महाकाली नदिमा स्नान गर्ने व्रतालुहरुको समेत विहानैदेखी भीड लागेको थियो । महाकाली नदिमा १५ हजार भन्दा बढी व्रतालुहरुले स्नान गरेको भीमदत्त नगरपालिका–११ का वडाध्यक्ष प्रकाश थापाले बताए ।
‘विहानै देखी दर्शन तथा स्नान गर्न आउने व्रतालुको भिड थियो ।’ उनले भने ‘भण्डै १५ हजार भन्दा बढी व्रतालुहरुले रामेश्वर मन्दिरमा दर्शन र महाकाली नदीमा स्नान गर्नुभएको छ ।’ भीमदत्त नगरपालिका–११ ले रामेश्वर मन्दिरमा दर्शन तथा महाकाली नदिमा स्नान गर्न आउने व्रतालुहरुको सहजताका लागि विभिन्न सेवाहरु उपलब्ध गराएको थियो ।
वडा कार्यालयले विभिन्न सरकारी गैरसरकारी संघसंस्थाहरु संगको समन्वयमा उक्त क्षेत्रमा निशुल्क खानेपानी देखी, मनोरञ्जनाका लागि म्यूजिक सिस्टम, हेल्थ डेक्स, सुरक्षा, उद्धार टोली, स्नान तथा लुगा चेन्जका लागि अस्थायी व्यवस्थित चेन्जिङ रुम लगाएतको व्यवस्था गरिएको थियो ।
जसले गर्दा त्यहा आएका व्रतालुहरुले उत्साह र सुरक्षित रुपमा दर्शन तथा स्नान गर्न पाएको बताएका छन् । ‘व्रतालुहरुलाई स्नान गर्दा कुनै समस्या नहोस् र त्यहाँ खानेपानी, कसैलाई कुनै स्वास्थ्य समस्या भए तत्काल उपचारका लागि हेल्थ डेक्स, रमाईलोका लागि म्यूजिक, टेन्ट लगाएत स्नान गर्दा कुनै दुर्घटना नहोस् भन्ने उद्देश्यले सुरक्षा तथा उद्धार सामाग्री सहित टोली लगाएतको व्यवस्था गरेका थियौँ ।’ वडाधयक्ष थापाले भने ‘सबै कुराको पूर्व तयारीले भव्य र सुरक्षित रुपमा व्रतालुहरुले दर्शन तथा स्नान गरी तीजको विदाई गर्नु भएको छ ।’
जिल्लाभरीबाट व्रतालुहरु निजि तथा सार्वजनिक सवारी साधनमा स्नानका लागि महाकाली नदि पुगेका थिए । स्नान गरिसकेपछि मन्दिर नजिकै व्रतालुहरु तीजका गितमा नाचगान गरि रमाईलो गरिरहेका थिए ।
तीजका व्रतालुले सप्तऋषिको पूजा नगरे व्रत पूरा नहुने र फल पनि नपाइने धार्मिक विश्वास छ । यसरी स्नान गरिसकेपछि अरुन्धती सहित अत्रि, गौतम, भारद्वाज, जमदग्नि, वशिष्ठ, कश्यप र विश्वा मित्रको पूजा गरिन्छ ।
सप्तऋषिको पूजा गर्नाले रजस्वलाका समयमा छाइछुई लगायत कुनै त्रुटि भएको भए ‘पाप’बाट मुक्ति पाइन्छ भन्ने धार्मिक विश्वास छ । ऋषिहरुको पूजा गरिसकेपछि चोखो खाने र नाचगान गरी तीजलाई विदाइ गर्ने प्रचलन छ ।
