महेन्द्रनगर । आध्यात्मिकबाट स्वच्छ र स्वस्थ समाज भन्ने नाराका साथ भारतको सिरोही जिल्ला माउन्ट आबु ब्रह्मा कुमारी संस्थानमा ग्लोबल शिखर सम्मेलन–२०२४ शुभारम्भ भएको छ । शुक्रबारदेखि शुरु भएको चारदिने विश्व सम्मेलनको भारतका राष्ट्रपती द्रौपदी मुर्मुले उद्घाटन गरेकी छन् ।
ब्रह्मा कुमारी संस्थानको निमन्त्रणामा भीमदत्त नगरपालिकाका नगरप्रमुख पदम बोगटी, शुक्लाफाँटा नगरपालिकाका नगर प्रमुख रणबहादुर महरा, उपप्रमुख कल्पना जोशी, नेपाली कांग्रेस कञ्चनपुरका सचिव भीमराज भट्ट लगाएतको उक्त सम्मेलनमा उपस्थिति रहेको छ ।
सो सम्मेलनलाई सम्बोधन गर्दै राष्ट्रपति मुर्मुले शुद्ध कर्मबाट मनलाई सुन्दर बनाउने माध्यम अध्यात्म भएको बताइन् । सम्मेलनमा सहभागी हुन पाउँदा खुसी लागेको भन्दैँ आत्मा स्वच्छ र स्वस्थ भयो भने सबै कुरा सम्भव हुने बताइन् ।
‘सरसफाई बाहिरी मात्रै नभएर हाम्रो विचारमा पनि हुनुपर्छ’ उनले भनिन् ‘भगवान अनौठो छ र हामी पनि अनौठो छौ । परमात्मा पावन रूप हुनुहुन्छ र हामी पनि पावन रुप हौं । धर्तीमा आएपछि आत्मालाई दाग लाग्छ। सामाजिक, मानसिक र भावनात्मक सबै एक अर्कासँग जोडिएका छन् । यी सबै तरिकामा स्वस्थ रहनु हाम्रो लागि महत्त्वपूर्ण छ ।’
