महेन्द्रनगर । भीमदत्त नगरपालिकाले कला, सांस्कृतिको पहिचान तथा संरक्षण गर्दै लोपोन्मुख परम्परागत बाजाको पुनर्जागरण गर्न १५ दिने दमाह बाजा सम्बन्धि तालिम सुरु गरेको छ । भीमदत्त नगरपालिकाका नगरप्रमुख पदम बोगटीको प्रमुख आतिथ्यतामा बिहीबार आयोजित एक कार्यक्रमका बिच तालिमको औपचारिक शुभारम्भ गरिएको हो ।
सो तालिममा दमाह बाजा बजाउने सीप सिकाइने छ, जसका लागि परम्परागत दमाह वादकहरूले प्रशिक्षण दिनेछन् । तालिममा स्थानीय दमाह बजाउने समुदायका सदस्यहरू, सांगीतिक रुचि भएका युवा तथा संस्कृति प्रेमीहरूको सहभागिता रहेको छ ।
कार्यक्रमलाई सम्बोधन गर्दै नगरप्रमुख बोगटीले सांस्कृतिक सम्पदाको संरक्षण तथा प्रवद्र्धन आफ्नो प्राथमिकता भएको उल्लेख गरे । उनले लोपोन्मुख बाजा तथा सांगीतिक परम्पराको जगेर्नाका लागि यस्ता तालिम आवश्यक रहेको बताउँदै आगामी दिनमा समेत यस्ता कार्यक्रमलाई निरन्तरता दिने प्रतिबद्धता व्यक्त गरे ।
‘पछिल्लो समय हामी हाम्रा कला सँस्कृति विर्सदैँ गएका छौँ । दमाह बाजा, पञ्चे बाजाको भन्दा पनि वैण्ड बाजा तर्फ हाम्रो समाज आकर्षित हुदैँ गएको छ ।’ उनले भने ‘सो कुरालाई मध्यनजर गर्दै हाम्रा परम्परागत बाजाको संरक्षण र दलित एवम् महिलाहरुको आर्थिक उन्ननतीका लागि १५ दिने दमाह बाजा बजाउन तालिन दिन लागिएको हो ।’
यस्तै उनले आफ्ना कला सँस्कृति संरक्षणका लागि सबैले आ–आफ्नो क्षेत्रबाट लाग्नुपर्नेमा जोड दिदैँ सीप सिकेपछि सीपको बजारीकरणका लागि समेत नगरपालिकाले आवश्यक सहयोग गर्ने प्रतिवद्धता व्यक्त गरे ।
कार्यक्रममा भीमदत्त नगरपालिकाका प्रमुख प्रशासकीय अधिकृत महेश बहादुर बमले दमाह बाजा नेपालको मौलिक वाद्ययन्त्रहरूमध्ये एक हो, जुन विशेष गरी परम्परागत समारोह, जात्रा तथा सांस्कृतिक पर्वहरूमा सगुनको रुपमा बजाइन्छ । यद्यपी आधुनिकताको प्रभावसँगै यसको प्रयोग घट्दै गएकोले संरक्षणका लागि तालिम संचालन गरिएको बताए ।
भीमदत्त नगरपालिका सामाजिक विकास समितिका संयोजक सुशिल भट्टले सो तालिमले युवाहरुलाई परम्परागत बाजा बनाउन र बजाउन सीप हस्तान्त्ररण गर्ने बताए । यस्तै कार्यक्रमका सभापती एवम् भीमदत्त नगरपालिका कार्यपालिका सदस्य हरिहर परियारले दमाह बाजाको संरक्षणको लागि नयाँ पुस्तालाई सिकाउन आवश्यक रहेको बताए ।
‘दमाह बाजा हाम्रो परम्परा, संस्कार र पहिचान संग जोडिएको सांस्कृतिक सम्पदा हो ।’ उनले भने ‘पछिल्लो समय नयाँ पुस्तामा यसको चासो घट्दै गएकोले संरक्षणका लागि यो कार्य आयोजना गरिएको हो ।’
यो तालिमले नयाँ पुस्तालाई दमाह बजाउने कला हस्तान्तरण गर्दै सांस्कृतिक धरोहरको संरक्षणमा महत्वपूर्ण योगदान दिने अपेक्षा गरिएको छ । पहिलो चरणमा १८ जनालाई तालिम दिन लागिएको नगरपालिकाले जनाएको छ ।
आफ्नो परम्परागत पेशा, बाजा कला सिक्न पाउँदा खुशी व्यत्तल गर्दै तालिममा सहभागिहरुले नगरपालिकालाई कार्यक्रमका लागि धन्यवाद व्यक्त गरे । उक्त कार्यक्रममा भीमदत्त नगरपालिका शिक्षा शाखा प्रमुख हरिदत्त जोशी, कार्यपालिका सदस्य गणेश आग्री, नगरपालिकाका कर्मचारी, तालिमका प्रशिक्षक, प्रशिक्षार्थी लगाएतको उपस्थिति रहेको थियो ।
