काठमाडौं । संयुक्त राज्य अमेरिकाका राष्ट्रपति डोनाल्ड ट्रम्पले मध्यपूर्वका सहयोगी मुलुकहरू इरानसँगको युद्ध अन्त्य गर्ने सम्झौताको प्रारम्भिक रूपरेखामा सहमत भएको दाबी गर्दै तत्कालका लागि नयाँ सैन्य आक्रमण नगर्ने सङ्केत दिएका छन्।
शनिबार सामाजिक सञ्जालमार्फत ट्रम्पले प्रस्तावित सम्झौतामा ‘स्ट्रेट अफ होर्मुज’लाई पूर्ण रूपमा खुला राख्ने र इरानको आणविक खतरा अन्त्य गर्ने विषय समावेश हुने बताएका छन्। यदि छिट्टै सम्झौता हुने अवस्था बन्यो भने विश्वको भविष्य र समृद्ध इरानका लागि आक्रमण रद्द गर्न आफू सहमत रहेको ट्रम्पले उल्लेख गरेका छन्। इजरायलले पनि युद्ध अन्त्यका लागि इरानसँग सम्झौता गर्ने अमेरिकी प्रयासलाई समर्थन गरेको ट्रम्पको भनाइ छ। यद्यपि, उनको घोषणाप्रति इरानले तत्काल कुनै प्रतिक्रिया जनाएको छैन।
अमेरिका र इजरायलले फेब्रुअरी २८ मा इरानविरुद्ध सैन्य कारबाही सुरु गरेका थिए। ट्रम्पको यो घोषणा साउदी युवराज मोहम्मद बिन सलमानसँग भएको टेलिफोन वार्तापछि आएको हो। वार्तामा साउदी युवराजले द्वन्द्व थप चर्किएमा इरानले खाडी मुलुकका ऊर्जा पूर्वाधारमा निशाना बनाउन सक्ने चिन्ता व्यक्त गरेका थिए। रणनीतिबारे छलफल गर्न साउदी रक्षामन्त्री खालिद बिन सलमानले वासिङ्टन पुगेर ट्रम्प र उपराष्ट्रपति जेडी भान्ससँग भेटवार्ता गरेका थिए।
यसै साता ट्रम्पले ह्वाइट हाउसमा इजरायली प्रधानमन्त्री बेन्जामिन नेतान्याहुसँग पनि प्रत्यक्ष भेटवार्ता गरेका थिए। नोभेम्बरमा हुने अमेरिकी मध्यावधि निर्वाचन नजिकिँदै जाँदा यो द्वन्द्व ट्रम्प प्रशासनका लागि राजनीतिक रूपमा चुनौतीपूर्ण बन्दै गएको छ। पछिल्लो तनावका बिच अमेरिकी विदेश मन्त्रालयले मध्यपूर्वका १० देशमा रहेका आफ्ना नागरिकका लागि उच्च सुरक्षा सतर्कता जारी गरेको छ।
