काठमाडौं । भारत र संयुक्त राज्य अमेरिकाबिच महत्वपूर्ण खनिज तथा दुर्लभ पृथ्वीजन्य तत्वहरूको आपूर्ति, खानी उत्खनन एवं प्रशोधनलाई सुरक्षित र व्यवस्थित बनाउने उद्देश्यका साथ एक ऐतिहासिक द्विपक्षीय सम्झौतामा हस्ताक्षर भएको छ। भारतीय विदेशमन्त्री एस जयशंकरले द्विपक्षीय छलफल र चारदेशीय सुरक्षा संवादका विदेश मन्त्रीहरूको बैठकपछि आयोजित पत्रकार सम्मेलनमा विश्वव्यापी रणनीतिक परिदृश्यमा यस सम्झौताको असाधारण महत्व रहेको घोषणा गर्नुभयो। उक्त बैठकमा समेत यसबारे गहन छलफल भएको जानकारी दिँदै उहाँले भविष्यका प्रविधिका लागि यी स्रोतहरू सुरक्षित गर्नु अनिवार्य भइसकेको उल्लेख गर्नुभयो। सम्झौताले महत्वपूर्ण खनिजहरूको खानी उत्खनन, प्रशोधन, बजार प्रवर्द्धन र सम्बन्धित क्षेत्रमा वैदेशिक लगानी भित्र्याउन सहज मार्गप्रशस्त गर्ने विश्वास लिइएको छ। यसले आपूर्ति शृङ्खलालाई सरल र विविधीकृत बनाउँदै दुवै मुलुकलाई वित्तीय तथा प्राविधिक सहयोग जुटाउन सघाउने विदेशमन्त्री जयशंकरको भनाइ छ।
यसै गरी अमेरिकी विदेशमन्त्री मार्को रुबियोले संयुक्त राज्य अमेरिकाका लागि भारतसँगको रणनीतिक साझेदारीको उच्च महत्व रहेको प्रस्ट्याउँदै यो सम्झौता त्यसकै एउटा ठोस र बलियो उदाहरण भएको बताउनुभयो। उहाँले आधुनिक डिजिटल र नवीनतामा आधारित अर्थतन्त्रका लागि महत्वपूर्ण खनिज तथा आपूर्ति शृङ्खलामा भरपर्दो एवं दीर्घकालीन पहुँच सुनिश्चित गर्न दुवै देशको समान रणनीतिक चासो रहेको उल्लेख गर्नुभयो। यो सम्झौता विशेष गरी उच्च-इलेक्ट्रोनिक्स, नवीकरणीय ऊर्जा प्रविधि, आधुनिक रक्षा प्रणाली र विद्युतीय सवारी साधन निर्माणका लागि मेरुदण्ड मानिएका तत्वहरूको आपूर्ति सुरक्षित गर्न केन्द्रित छ। पछिल्लो समय कुनै एक देशमा मात्रै निर्भर रहँदा विश्वव्यापी आपूर्तिमा आउने अवरोधलाई कम गर्न र यस क्षेत्रमा विविधीकरण ल्याउन चालिएको विश्वव्यापी प्रयासकै रूपमा वासिङ्टन र नयाँ दिल्लीबिचको यो रणनीतिक गठबन्धन अगाडि बढेको विश्लेषकहरूले बताएका छन्।
