काठमाडौँ
नेपाली कांग्रेसको १५औँ राष्ट्रिय महाधिवेशन आइतबारदेखि राजधानी काठमाडौँमा सुरु हुँदै छ। खुलामञ्चमा दिउँसो २:०० बजे भव्य समारोहका बीच महाधिवेशन उद्घाटन गर्ने सम्पूर्ण तयारी पूरा भएको छ।
पार्टी केन्द्रीय प्रवक्ता देवराज चालिसेका अनुसार स्वदेश तथा विदेशबाट गरी सात हजारभन्दा बढी महाधिवेशन प्रतिनिधि काठमाडौँ आइपुग्ने क्रम जारी छ। प्रतिनिधिहरूको दर्ता पार्टी केन्द्रीय कार्यालय सानेपामा भइरहेको छ भने सहभागिता दर्ता शुल्कबापत प्रतिव्यक्ति रु ३,५०० तोकिएको छ। आवास व्यवस्थापनका लागि हरेक निर्वाचन क्षेत्र, जिल्ला र प्रदेशबाट एक/एक जना संयोजक तोकिएको छ भने प्रतिनिधिहरूलाई आवाससम्बन्धी विवरण ह्वाट्सएप, एसएमएस र एआई नम्बरमार्फत उपलब्ध गराउने प्रबन्ध मिलाइएको छ।
उद्घाटनपछि असोज १९ र २० गते बन्दसत्र सञ्चालन हुनेछ। बन्दसत्रमा सभापति, उपसभापति, महामन्त्री र कोषाध्यक्षले आ-आफ्नो प्रतिवेदन पेस गर्नेछन्। प्रतिवेदनमाथि भूगोलका आधारमा तीन फरक हलमा छलफल गराइनेछ भने सहभागीहरूका लागि डिजिटल बोर्डमार्फत प्रतिवेदन हेर्न र सुन्न सकिने प्रविधिमैत्री व्यवस्था गरिएको छ। यस्तै, निर्वाचन समितिले असोज १९ गते दिउँसो २:०० देखि साँझ ६:०० बजेसम्म राष्ट्रिय सभागृहमा उम्मेदवारी मनोनयनको समय तोकेको छ।
ऐतिहासिक पृष्ठभूमि: स्थापनादेखि १५औँ महाधिवेशनसम्म
विसं २००३ साल कात्तिक १५ गते भारतको बनारसमा स्थापना भएको कांग्रेसको सात दशकभन्दा लामो सांगठनिक यात्रा र नेतृत्वको संक्षेप:
- स्थापना (२००३ कात्तिक १५): बनारस (भारत), संयोजक: विश्वेश्वरप्रसाद कोइराला, अध्यक्ष: सुब्बा देवीप्रसाद सापकोटा
- पहिलो महाधिवेशन (२००३ माघ १२–१३): कोलकाता (भारत), सभापति: टङ्कप्रसाद आचार्य (जेलमा), कार्यवाहक सभापति: विश्वेश्वरप्रसाद कोइराला
- दोस्रो महाधिवेशन (२००४ माघ २०–२२): बनारस (भारत), सभापति: विश्वेश्वरप्रसाद कोइराला
- तेस्रो महाधिवेशन (२००५ फागुन १८): दरभङ्गा (भारत), सभापति: मातृकाप्रसाद कोइराला
- चौथो महाधिवेशन (२००६ चैत २७): कोलकाता (भारत), सभापति: मातृकाप्रसाद कोइराला
- पाँचौँ महाधिवेशन (२००९ जेठ १०–१२): जनकपुर, सभापति: विश्वेश्वरप्रसाद कोइराला
- छैटौँ महाधिवेशन (२०१२ माघ): वीरगन्ज, सभापति: सुवर्णशमशेर जबरा
- विशेष महाधिवेशन (२०१४ जेठ): विराटनगर, सभापति: विश्वेश्वरप्रसाद कोइराला
- सातौँ महाधिवेशन (२०१७ वैशाख २५–३१): काठमाडौँ, सभापति: विश्वेश्वरप्रसाद कोइराला (२०३४ सम्म विपी कोइराला सभापति, त्यसपछि २०४८ फागुनसम्म कृष्णप्रसाद भट्टराईले कार्यवाहक चलाए)
- आठौँ महाधिवेशन (२०४८ फागुन १–३): झापा, सभापति: कृष्णप्रसाद भट्टराई
- नवौँ महाधिवेशन (२०५३ वैशाख २६–२८): काठमाडौँ, सभापति: गिरिजाप्रसाद कोइराला
- दसौँ महाधिवेशन (२०५७ माघ ९): पोखरा, सभापति: गिरिजाप्रसाद कोइराला
- एघारौँ महाधिवेशन (२०६२ भदौ १४–१७): काठमाडौँ, सभापति: गिरिजाप्रसाद कोइराला
- बाह्रौँ महाधिवेशन (२०६७ असोज १–५): काठमाडौँ, सभापति: सुशील कोइराला
- तेह्रौँ महाधिवेशन (२०७२ फागुन २०–२३): काठमाडौँ, सभापति: शेरबहादुर देउवा
- चौधौँ महाधिवेशन (२०७८ मङ्सिर २४–२७): काठमाडौँ, सभापति: शेरबहादुर देउवा
- विशेष महाधिवेशन (२०८२ पुस २७): काठमाडौँ, सभापति: गगनकुमार थापा
