धनगढी। कैलालीको चुरे गाउँपालिका–१, निगालीमा नातीको पास्नी भोजमा भएको विवादमा कुटपिट गरी ५२ वर्षीय यज्ञबहादुर बोहराको हत्या गरिएको खुलेको छ।
इलाका प्रहरी कार्यालय मालाखेतीका अनुसार असोज ५ गते पास्नी भोजमा मदिरा सेवनका क्रममा भएको विवादपछि कुटपिट हुँदा बोहराको सोही राति मृत्यु भएको थियो। घटना लुकाउन र भिरबाट लडेर मृत्यु भएको देखाउन शवलाई स्थानीय तुलिखेत जङ्गलको भीरमा फालिएको प्रारम्भिक अनुसन्धानबाट खुलेको छ।
मृतकका छोराको जाहेरीका आधारमा प्रहरीले भोज आयोजक धनबहादुर बोहरा र कुटपिटमा संलग्न मानबहादुर बोहरासहित आठ जनालाई पक्राउ गरेको छ। पक्राउ परेका सबैमाथि कर्तव्य ज्यान मुद्दा दर्ता गरी थप अनुसन्धान भइरहेको प्रहरी नायब उपरीक्षक (डीएसपी) हिरा सिंह महराले जानकारी दिए।
