काठमाडौं । अमेरिका र इरानबीच मध्यपूर्वमा चुलिँदो सैन्य तनावका कारण विश्वव्यापी इन्धन बजार पुनः प्रभावित भएको छ। रणनीतिक रूपमा महत्त्वपूर्ण मानिने होर्मुज स्ट्रेट क्षेत्रमा विकसित पछिल्लो घटनाक्रमसँगै अन्तर्राष्ट्रिय बजारमा कच्चा तेलको मूल्यमा करिब १ प्रतिशतको वृद्धि देखिएको छ।
पछिल्लो कारोबार अनुसार अन्तर्राष्ट्रिय बेन्चमार्क ‘ब्रेन्ट क्रुड’ को मूल्य ८३ सेन्ट (०.९ प्रतिशत) ले बढेर प्रतिब्यारेल ९२.२९ अमेरिकी डलर पुगेको छ। यसैगरी, अमेरिकी ‘वेस्ट टेक्सास इन्टरमिडिएट’ (डब्लुटीआई) को मूल्य पनि ६८ सेन्ट (०.८ प्रतिशत) को बढोत्तरीका साथ प्रतिब्यारेल ८८.९७ डलर कायम भएको छ। केही समयअघि मात्रै तेलको भाउ सात हप्तायताकै न्यून विन्दुमा झरेको भए तापनि होर्मुज स्ट्रेटको सुरक्षा जोखिमका कारण बजारमा पुनः उछाल आएको हो।
अमेरिकी केन्द्रीय कमाण्ड (सेन्टकम) का अनुसार, इरानले होर्मुज स्ट्रेट नजिकै अमेरिकाको ‘अपाचे’ हेलिकप्टर खसालेको दाबी गर्दै त्यसको बदलास्वरूप अमेरिकी वायुसेना र नौसेनाका लडाकु विमानहरूले इरानको केशम टापु र आसपासका क्षेत्रमा मिसाइल आक्रमण गरेका छन्। उक्त ‘सटीक कारबाही’ मार्फत इरानको वायु रक्षा प्रणाली, स्थलगत नियन्त्रण केन्द्र र निगरानी राडारहरूलाई निसाना बनाइएको र हाललाई यो सैन्य अभियान पूरा भएको अमेरिकाले स्पष्ट पारेको छ। पश्चिम एसियामा बढ्दो यो द्वन्द्वका कारण आगामी दिनमा विश्व बजारमा इन्धन आपूर्ति र मूल्य थप अस्थिर हुन सक्ने अनुमान विश्लेषकहरूले गरेका छन्।
