टेम्पो फाल्ने वन कर्मचारीलाई कारबाही हुनुपर्छ: धामी दम्पती

कैलाली । कैलालीको गोदावरी नगरपालिका–४ बासपानीस्थित भीमदत्त राजमार्गको छेउमा सानो व्यापार गरेर जीविकोपार्जन गर्दै आएकी स्थानीय धनादेवी धामीको टेम्पो (पसल) वन कार्यालयका कर्मचारीले भीरबाट खसालिदिएपछि यसको चौतर्फी आलोचना भएको छ। वन क्षेत्र अतिक्रमण गरेको आरोपमा शनिबार वन टोलीले सो कार्य गरेको हो भने घटनाको भिडियो सामाजिक सञ्जालमा भाइरल भएपछि सर्वसाधारणदेखि सांसदहरूले समेत वन प्रशासनको क्रूर व्यवहारप्रति कडा आपत्ति जनाएका छन्। पीडित धामीले आफूले सो टेम्पो घर लैजाने र अबदेखि व्यवसाय नगर्ने भन्दै अनुनय-विनय गर्दागर्दै पनि कर्मचारीहरूले जबरजस्ती भीरमा धकेलेको गुनासो गरेकी छन्, जसका कारण १० जनाको परिवार पाल्ने उनको एक मात्र आधार खोसिएको छ। यता डिभिजन वन कार्यालय धनगढीले भने सो क्षेत्रमा वन अतिक्रमण हटाउने अभियान अन्तर्गत नै उक्त कार्य गरिएको र घटनालाई अतिरञ्जित बनाइएको दाबी गर्दै आफ्नो बचाउ गरेको छ। कानुनी रूपमा नियन्त्रणमा लिने विकल्प हुँदाहुँदै बल प्रयोग गरिएको भन्दै स्थानीय स्तरमा आक्रोश बढेको छ भने पीडित परिवारले क्षतिपूर्ति भन्दा पनि यसरी अत्याचार गर्ने दोषी कर्मचारीमाथि हदैसम्मको कानुनी कारबाही हुनुपर्ने अडान राखेका छन्।