महेन्द्रनगर । माइती नेपाल कञ्चनपुरले एक वर्षमा मानव बेचविखनमा परेका ११ जनाको उद्धार गरेको छ ।
भारतका विभिन्न सहरहरुबाट मानव बेचविखनमा परेका ११ जनालाई उद्धार गरिएको माइती नेपाल कञ्चनपुरले जनाएको छ ।
आइतवार भीमदत्त नगरपालिकामा सम्पन्न भएको नगर परियोजना परामर्श समिति बैठकमा माइती नेपाल कञ्चनपुरका संयोजक महेश्वरी भट्टले एक वर्षमा गरिएको कार्यप्रगती प्रस्तुत गर्दै ५ जना कञ्चनपुरका, २ जना काभ्रेपलाञ्चोक, २ जना बझाङ र १ जना तनहुका गरी मानव बेचविखनमा परेका ११ जनाको भारतका विभिन्न सहरुहरुबाट उद्धार गरिएको बताइन् ।
उनकाअनुसार २०८० फागुन १८ गते देखी २०८१ फागुन ०८ गतेसम्म २ सय ७१ जनालाई सीमानाकामा रोकथाम, उद्धार तथा पुनस्र्थापना गरिएको छ ।
माइती नेपालले हिंसा न्यूनिकरण तथा मानव बेचविखन विरुद्ध जनचेतना मुलक कार्यक्रम समेत गर्दै आएको छ ।
बैठकमा भीमदत्त नगरपालिकाका नगर उपप्रमुख नीलम लेखक जोशीले माइती नेपालले गरेको कार्यको प्रशंसा गर्दै मानव बेचबिखन तथा ओसारपसारविरुद्धको अभियानमा सबैले एकजुट भएर लाग्नुपर्नेमा जोड दिइन् ।
बैठकमा अन्य सहभागीहरुले विद्यालयस्तरमा मानव बेचविखन तथा ओसारपसर विरुद्ध सचेतना कार्यक्रम गर्न सुझाव व्यक्त गरे । फ्रि अ गर्ल नेदरल्याण्डको आर्थिक सहयोगमा सञ्चालित नेपाल–भारत सीमापार मानव बेचबिखन तथा ओसारपसार न्यूनीकरणका लागि सीमा निगरानी कार्यक्रम सम्बन्धी परियोजना अन्र्तगत बैठक बसेको हो ।
बैठकमा हालसम्म गरेका कामको समीक्षा गर्दै सो गतिविधिलाई निरन्तरता दिदै आगामी दिनमा थप प्रभावकारी रुपमा मानव बेचविखन विरुद्ध काम गर्ने विषयमा छलफल भएको छ ।
