धनगढी । चुनावी अभियानका क्रममा राष्ट्रिय स्वतन्त्र पार्टी (रास्वपा) का वरिष्ठ नेता एवं प्रधानमन्त्री बालेन शाहले “सुदूर अब दूर नाई, झिकै झिकै माया तमलाई” भन्दै सुदूरपश्चिमप्रति नयाँ राजनीतिक प्रतिबद्धताको सन्देश दिएका थिए। हालै कैलालीमा आयोजित रास्वपाको जिल्ला अधिवेशनमा पार्टीका नेता केपी खनालले पुराना दलहरूको कार्यशैलीको आलोचना गर्दै सोही भावनात्मक नारा फेरि दोहोर्याएका छन्। नयाँ राजनीतिक शक्तिको उदय र सरकार गठन भएको छोटो अवधिमा प्रशासनिक सुधारका केही सकारात्मक प्रयासहरू भए पनि ३५ वर्षसम्म शासन गरेका दलहरू र केही महिनाअघि मात्र सरकारमा पुगेको दलबीच प्रत्यक्ष तुलना गर्नु न्यायसंगत नहुन सक्छ। तर, सुदूरपश्चिमले भोगिरहेको गरिबी, बेरोजगारी, युवा पलायन, र सडक पूर्वाधारको अभाव जस्ता दीर्घकालीन समस्या समाधानका लागि केवल सांस्कृतिक निकटता र भाषण मात्र नभएर नतिजामुखी नीति र बजेट आवश्यक हुने बहस यतिबेला सुरु भएको छ।
अर्थमन्त्री डा. स्वर्णिम वाग्लेले अर्थतन्त्रमा सृजनात्मक परिवर्तनको वकालत गरे पनि सार्वजनिक बजेटको मूल संरचना अझै पुरानै ढाँचामा चालु खर्च र ऋण भुक्तानीमा बढी केन्द्रित देखिन्छ। सुदूरपश्चिमको पर्यटनका क्षेत्रमा खप्तड, बडीमालिका र रारा क्षेत्रका केही योजनाहरू समेटिए पनि प्रदेशका गौरवका आयोजनाहरू जस्तै सेती राजमार्ग, महाकाली राजमार्ग, र खुटिया-दिपायल द्रुतमार्ग जस्ता सडक पूर्वाधार, खानेपानी, र उर्जा क्षेत्रका ठूला परियोजनाहरूमा कति बजेट विनियोजन भयो भन्ने कुरा स्पष्ट हुन सकेको छैन। सरकार गठनको छोटो समयमै सबै परिणामको अपेक्षा गर्नु यथार्थपरक नभए पनि रास्वपाले सुदूरपश्चिमप्रति व्यक्त गरेको प्रतिबद्धता नारामा मात्र सीमित रहन्छ वा आगामी दिनका नीति, बजेट र विकास योजनामार्फत व्यवहारमा देखिन्छ भन्ने कुरा अब भाषणले भन्दा पनि भोलिको परिणामले स्पष्ट पार्नेछ।
